किराणा दुकानातून चक्क देशी दारूची विक्री, हिंगोलीतील अजब प्रकार

हिंगोली: हिंगोली जिल्ह्यात कळमनुरी तालुक्यातील रेडगाव येथे एका किराणा दुकानावर आखाडा बाळापूर पोलिसांनी छापा टाकून देशी दारूच्या बाटल्या जप्त केल्या आहेत. या प्रकरणी एक जणाविरुध्द आखाडा बाळापूर पोलीस ठाण्यात बुधवारी सायंकाळी गुन्हा दाखल झाला आहे.पोलिसांच्या या कामगिरीमुळे राज्य उत्पादन शुल्क विभागाच्या कार्यपध्दतीवर शंका व्यक्त केली जातहिंगोली जिल्ह्यात बेकायदेशीर दारू विक्रेत्यांनी उच्छाद मांडला असून ग्रामीण भागात सर्रासपणे उघड्यावर बेकायदेशीर देशीदारूची विक्री केली जात आहे. या सोबतच जिल्ह्यातील ढाबे आणि मुख्य रस्त्यालगतच्या हॉटेलमधूनही देशीदारूची विक्री होऊ लागली आहे. ग्रामीण भागातून दारू विक्रीमुळे होणाऱ्या त्रासाला कंटाळून अनेक गावांतून महिलांनी दारू विक्री बंद करण्याची मागणी केली आहे. मात्र, प्रत्येकवेळी यासाठी पोलीस विभागाला जबाबदार धरून राज्य उत्पादन शुल्क विभागाच्या कारभाराकडे डोळेझाक होऊ लागल्याचे चित्र पाहायला मिळाले आहे.दरम्यान, कळमनुरी तालुक्यातील रेडगाव येथे एका किराणा दुकानातून देशीदारुची विक्री होत असल्याची माहिती पोलिसांना मिळाली होती. त्यावरून सहाय्यक पोलीस निरीक्षक पंढरीनाथ बोधनापोड, उपनिरीक्षक शिवाजी बोंडले, जमादार शेख बाबर, शेख गौसोद्दीन यांच्या पथकाने बुधवारी (१ जून) दुपारी किराणा दुकानावर अचानक छापा टाकला.दुकानाच्या तपासणीमध्ये देशी दारूच्या सुमारे २० बाटल्या आढळून आल्या आहेत. पोलिसांनी दारुच्या बाटल्या जप्त केल्या असून याप्रकरणी दुकानदार दयानंद हनवते याविरुध्द आखाडा बाळापूर पोलीस ठाण्यात गुन्हा दाखल करण्यात आला आहे.

Leave a Reply

Your email address will not be published. Required fields are marked *